شهریار سایتینین خبرینه گوره، یعقوب هوشیار تبریزین تعطیل سیز جمعه لر آدلی گوروشلرینده، ایکینجی خطین اوچونجو ایستگاهی‌نی دا دئدی: ایکینجی خط ۲۲.۴ کیلومتر اوزونلوغوندا و ۲۰ دوراق (ایستگاه) ایله تبریزین غربینی بسیج میدانینا باغلایر.
او، بیرینجی فازین حفارلیق ایشلرینین کئچن ایلده بیتدیگینی قئید ائدرک دئدی: بو خط اوچ فازدا تعریف و اجرا اولونوب کی، بو گونه قدر بیرینجی و ایکینجی فازلاردا ۱۵ کیلومتر حفر ایشی گورولوب.
بلدیه رئیسی بئله آرتیردی: ایکینجی خطین بیرینجی فازینین حفر ایشی ۱۰ کیلومتر اوزونلوغوندا و ۸ ایستگاه ایله قره ملیک دن دانشسرا میدانینا قدر بیتمیشدیر و ایستگاهلارین اساس تیکینتی ایشلری داوام ائدیر کی بو ۸ ایستگاه‌دان بئشی ایشله‌دیله‌جک و خدمته حاضر اولاجاق.
هوشیار ایکینجی خطین ایستگاهلارینین اجرا ایشلرینین سرعتلندیرمه سینه تاکید ائدرک دئدی: اونجه‌کی وعده‌میز اساسیندا گله‌جک ایلده ایکینجی خطین بیرینجی فازیندان ایستیفاده اولوناجاق.
او، اوز دانیشیق‌لاری‌نین باشقا بیر بولومونده تبریز متروسونون اوچونجو خطینین حفر ایشلرینه باشلاندیغینی قئید ائدرک دئدی: اوچونجو خط ۱۰ کیلومتر اوزونلوغوندا و ۱۰ ایستگاه ایله تبریزین فرودگاهینی تبریزین شهرلر آراسی اتوبوس ترمینالینا باغلایر.
تبریز بلدیه رئیسی دئدی: بیرینجی مترو خطینین سهند و سبلان آدلی حفر ائدن تی. بی. ام ماشین لاری، اوچونجو خطین چیخیش شفتینده یئرلشن تبریز ترمینالیندا اورهال اولونوب و گلن آی‌دان اعتباراً بو خطین حفر ایشلری ایکی تونئل شکلینده باشلاناجاق.
هوشیار دانیشیق‌لاری‌نین سونوندا اومید ائله‌دی کی، دولت تبریزین شهری قطار پروژه سینده اوز تعهدلرینه عمل ائده‌جک و خارجی فاینانسین تئزلشدیریلمه‌سی ایله ایکینجی مترو خطی ده ان قیسا زاماندا ایشله‌دیکدن سونرا خدمته حاضر اولاجاق.
نظرات