شهریار سایتینین خبرینه گوره، یعقوب هوشیار دئدی: شهرین اسلامی شوراسینین بئشینجی دوورو ایله مقاییسه‌ده کی فقط ۴۶ هکتار یاشیللیق ساحه سی شهره علاوه ائدیلمیشدی، بو دوورده بو ساحه‌ده گورکملی بیر بویومه‌یه شاهید اولموشوق.
یعقوب هوشیار، شهر حیاتینین کیفیتینین یاخشیلاشماسیندا یاشیل ساحه لرین اهمیتی‌نی وورغولایاراق دئدی: تبریز بلدیه‌سی بو توسعه روندینی داوام ائتدیرمگه چالیشیر و بو میقداری ۶۰۰ هکتارا یوکسلدمه یی هدف توتوب. البته بو میقداردان ایندیه‌دک ۳۰۰ هکتاری گرچکلشیب.
او داوام ائتدی: ایندی تبریزین ۱۵ میلیون متر مربع دن چوخ اولچوده ۲۹۶ پارکی و هر بیر نفره ۴.۱۷ متر مربع یاشیل ساحه سی وار و جمعی تبریزین یاشیللیق ساحه‌سی ۳۰ میلیون متر مربعدیر.
تبریز بلدیه رئیسی بیلدیریب: بو یاشیللیق شهرین طبیعی گوزللیکلرینی یاخشیلاشدیرماقلا یاناشی، تبریز ساکینلری‌نین عمومی ساغلاملیق وضعیتینین یاخشیلاشماسیندا و رفاهینین آرتماسیندا دا مهم رول اویناییر.
او همچنین بلدیه‌نین شهر یاشیل ساحه لرینده شیمیایی کودلار بوتونلوکله آرادان قالدیرماق اوچون پلانلاشدیردیغی حاقدا خبر وئریب اعلان ائتدی: ایندی شهر سطحینده بو سیاستین پیاده ائدیلمه‌سی اوچون بیر علم-تحقیقاتی مجموعه ایله موقاویله باغلاما حالینداییق.
او علاوه ائتدی: بو تدبیرین مقصدی، شیمیایی ماده‌لرین یاشاییش محیطینه و همشهریلرین ساغلاملیغینا ضررلی اثرلرینی آزالتماقدیر.
هوشیار، صحبتی‌نین باشقا بیر بولومونده شهر خانیم‌لاری اوچون اوزل بیر پروژه‌یه اشاره ائدیب بو باره‌ده بیان ائتدی: تبریز خانیم‌لاری اوچون ان بویوک رفاه مجموعه‌سینی قورماق اوچون ۵۰ هکتار یئر الده ائتمه حالیندایق کی، ایندیه‌دک ۲۵ هکتاری الده ائدیلیب.
او آرتیریب: بو پروژه، خانیم‌لار اوچون اوزل مکانلارین توسعه‌سی ساحه‌سینده مهم تدبیرلردن بیری کیمی نظره آلینیر و تبریز خانیم‌لارینین اجتماعی، مدنی و ایدمان فعالیتلری اوچون موناسیب بیر مکانین تامین ائدیلمه‌سی قرارلاشدیریلیب.
او همچنین سون اوچ ایلده ۳۶ یئنی پارک قورولماسیندان خبر وئریب آرتیردی: گلن ایلده بلدیه بولگه‌لرینی موظف ائتمیشیک کی شهر محدوده سی ایچینده یاشیللیق توسعه سینی بیرینجی اولویتده یئرلشدیرسینلر.
نظرات