شهریارین سایتینین خبرینه گوره، ورزش و جوانلار وزیری بو گوروشده بلدیه‌لرده ایدمان قورولوشونون جانلاندیریلماسینین اهمیتینه تاکید ائدیب دئدی: بو اقدام، موختلیف ایدمان ساحه‌لرینی گوجلندیره‌جک، قهرمانلار یئتیشدیره‌جک و تایسیز استعدادلاری موختلیف رشته‌لرده میللی تیم لر تحویل وئره‌جک.
احمد دنیامالی بلدیه‌لرین اساس تیکینتی و زیرساختلاری یارادیلماسی ایله موختلیف ایدمان رشته‌لرینی گوجلندیرمه‌سینین لازیملی اولدوغونا ایشاره ائده‌رک خاتیرلاتدی: میلی وفاق دولتی ورزش و جوانلار ساحه‌سینه اوزل بیر اهمیت وئریر.
او، تبریز بلدیه سینین ایدمان مکانلارینین اینکیشافی و همچنین آذربایجان شرقی ایالتینین ایدمان هیئتلرینه دستک وئرمه‌سینه گوره تشکورونو بیلدیریب، تبریز بلدیه سینین بو ساحه‌ده‌کی برنامه‌لرینین گلن ایل ده داوام ائدجگینه امودو اولدوغونو بیلدیریب.
همچنین تبریز بلدیه رئیسی یعقوب هوشیار بو گوروشده بلدیه‌نین بو ایلکی ۳۰ تریلیون تومن‌لیک بودجه‌سینه و اونون یوزده ۷۰ینین عمرانی خرجلره تخصیص ائدیلمه‌سینه ایشاره ائده‌رک تصریح ائتدی: ایدمان ساحه‌سینه دیقت یئتیرمک، همشهریلرین ساغلاملیق سویه‌سینی یوکسلتمکله یاناشی، اجتماعی نشاطین آرتماسیندا اوزل بیر یئره صاحیب اولوب.
او، معظم رهبرین بلدیه لر طرفیندن اجتماعی فعالیتلرین اولویتده قرار وئریلمه‌سی باره‌ده‌کی تاکیدینه ایشاره ائده‌رک، بئله دئدی: تبریز بلدیه‌سی مدنی و اجتماعی ساحه‌لرده موختلیف برنامه‌لر کئچیرمکله یاناشی، یوخسول منطقه‌لری محور ائده‌رک چوخلو ایدمان پروژه‌لری ایجرا ائتمکله تبریزین ورزشی سرانه‌لرینی یوکسلتمه‌یه باشلاییب.
هوشیار، تبریز بلدیه سینین ایکی ایل آردیجیل اولاراق عمومی ایدمان ساحه‌سینده اولکه بیرینجی‌سی اولدوغونو بیلدیره‌رک خاطیرلاتدی: بو ایل ایکینجی دفعه آردیجیل اولاراق ۱۵ مین همشهریه ایدمان اوزره پولسوز خدمت لر وئریلیب.
تبریز بلدیه رئیسی، ۷۰ ورزشی پروژه‌نین عمرانی عملیاتینا گئچن ایلدن باشلانیلدیغینی و بو زیرساخت پروژه‌لرینین بیر قیسمینین ایستیفاده‌یه وئریلدیگینی بیلدیره‌رک علاوه ائتدی: بلدیه ۷۰ پروژه نین ایجراسی اوچون ۱۵۰۰ میلیارد تومن بودجه تخصیص ائدیب کی، بو پروژه‌لرین ایستیفاده‌یه وئریلمه‌سی ایله شهرین آدام باشینا(سرانه) حاضر اولان ایدمان ساحه لری ایکی قات آرتیر.
او، تبریزلی گنجلرین موختلیف ایدمان رشته‌لرینده میللی تیملرده ایفتیخار یارادیلماسی اوچون چوخلو ایستعداد و پوتانسیل‌لری اولدوغونو بیلدیره‌رک دئدی: بلدیه زیرساخت‌لارین تامین ائدیلمه‌سی ساحه‌سینده سالن و ایدمان مئیدانلاری‌نین اینشا ائدیلمه‌سی ایله دولتین یانیندا و اونونلا بیر سیرادا، گنجلرین استعدادینی تاپماقدا تاثیرلی رول اویناییر.
نظرات