شهریار سایتین خبرینه گوره، یعقوب هوشیار تهران مطبوعات صاحبلری ایله اولان مطبوعات اوتوروموندا دئدی: "تهراندا تبریز مدنیت هفته‌سی" آدلی میلّی تدبیر، ۲۲ بهمن یوم‌اللهی یوروشو ایله عینی زاماندا باشلاییب، معظم رهبریمیزی (مدظله‌العالی) گورندن سونرا، بهمن آیی‌نین ۲۹-دا، تبریز خالقی‌نین ۱۳۵۶-جی ایلده‌کی قیامینین ایلدونومو گونو سونا چاتاجاق.
او، مدنیت هفته‌سی موناسیبتیله تبریز ظرفیتلری‌نین تهراندا پایلاشیلماسینا ایشاره ائده‌رک علاوه ائتدی: ایران ایسلام جمهوریتی‌نین موحکملیگی، اولکه‌نین بوتون ظرفیتلری‌نین موحکملیگی ایله باغلی‌دیر و اونا گوره تهراندا تبریز مدنیت هفته‌سی کئچیریله‌جک.
تبریز بلدیه رئیسی قئید ائتدی: بو میلّی تدبیر بهمن آیی‌نین ۲۲-دن ۲۹-نا قدر لاله و دانیشیق پارکلاریندا و صنعتکارلار ائوینده کئچیریله‌جک و مراسیملرین باشا چاتماسی "تبریز گئجه‌سی" عنوانی ایله بهمن آیی‌نین ۲۸-ده میلاد بورجوندا ایجرا اولوناجاق.
او، تهراندا تبریز مدنیت هفته‌سی‌نین محتواسینا ایشاره ائده‌رک خاطیرلاتدی: تبریز و آذربایجان ال ایشلری‌نین تانیتدیریلماسی، مدنی و صنعتی سرگیلر، موسیقی گئجه‌لری، قیسا فیلم یاییملانماسی، موضوع اوتوروملاری، تخصصی اوتوروملار، فیروزه سرگیسی، تصویرله‌مه، خوشنویسی، رساملیق و خانملارا اوزل بیر اوتوروم، تهراندا تبریز مدنیت هفته‌سی‌نین گورکملی برنامه‌لریندن‌دیر.
یعقوب هوشیارین سوزلرینه گوره، "تهراندا تبریز مدنیت هفته‌سی" آدلی میلّی تدبیرین یاخشی سونوجو، تبریز ابدی جنت عنوانی ایله کئچیریله‌جک، میلاد بورجوندا تبریز مدنیت گئجه‌سی‌نین کئچیریلمه‌سی و انقلاب رهبری(مدظله‌العالی) ایله گوروش اولاجاق.
بیلدیریلمه‌لی‌دیر کی، "تهراندا تبریز مدنیت هفته‌سی" تدبیری ۳۱ برنامه ایله، موختلیف مدنی اجتماعی، سیاحت و سرمایه‌قویما ساحه‌لرینده ۸ اساس هدفه اویغون اولاراق تعریف اولونوب کی، میلاد بورجونون، آزادلیق بورجونون، صنعت تالاری‌نین، شمس تالاری‌نین و لاله پارکی‌نین، دانیشیق و صنعتکارلارین تالارلاریندا کئچیریله‌جک.
همچنین، اینقیلابی گنجلر همایشی، مدنی دیپلوماسی و تبریز جهان‌شهری، محراب شهیدلری‌نین حورمتله خاتیرلانماسی، حضرت مهدی‌نین (عج) بویوک بایرامی و میلاد بورجوندا تبریز مدنیت گئجه‌سی، تهراندا تبریز مدنیت هفته‌سی‌نین بئش اساس تدبیری اولاجاق.
نظرات