شهریار خبر سایتیندان وئریلن خبره گوره، یعقوب هوشیار "شهید آیت‌الله آل‌هاشم" یولونون آچیلماسی پروژه سینی تبریزین ان آغیر و فنی طرحلریندن بیری اولماسینی بیلدیریب دئدی: "یوکسک شیب و یاماجلی و بویوک ارتفاع فرقی سببیله، بو پروژه نین اجراسی جسارت و آغیر فنی ایش طلب ائدیردی."
تبریزین بلدیه رئیسی "شهید علی‌نژاد" آلت کئچید کورپونو پروژه سینه ایشاره ائده رک، دئدی: "بو مسیرین شیبینی ۱۸%-دن ۹%-ا آپارماق اوچون بویوک بودجه و قارماشیق (پیچیده) فنی عملیات لازیم ایدی. بو شرایطه باخمایاراق، تبریز بلدیه‌سی ایکی ایل مدّتده اجرا ائدیلمه سی برنامه‌لشدیریلمیش بو پروژه نی ایکی آی مدّتینده حیاتا کئچیره جک."
هوشیار بو مسیرین آچیلماسی اوچون ۸ هکتار اراضینین تملیک ائدیلدیگینی ده بیلدیریب، بعضی تملیکلرین طرحین اصلی حیطه سیندن کنار اولاراق، شهروندلرین گئدیش-گلیشینی آسانلاشدیرماق اۆچون ائدیلدیگینی دئدی.
بلدییه باشچیسی، بلدیه نین فنی ایشلر و پروژه نین حاشیه‌سیز شکیلده ایره لیله مسی اوزرینده چالیشدیغینی وورغولایاراق، رسمی آچیلیشدان سونرا پروژه نین اجراسینین حاققیندا اسلامی شهر شوراسینا تام و مستند بیر گزارش وئریله جگینی تصریح ائدیب.
هوشیار، "شهید آل‌هاشم" یول آچیلماسی پروژه سینی انقلابدان سونرا تبریزین ان قارماشیق فنی پروژه سی اولاراق قئید ائدیب، خرداد آیینین اوللرینده و رئیس جمهورون حضوروندا بو طرحین حیاتا کئچیریلمه سی اۆچون چالیشدقلارینی بیلدیردی.
بلدییه رئیسی، "شهید علی‌نژاد" آلت کچید کورپوسو (زیرگذر) عملیاتلارینین فروردینین ۱۲ دن اعتباراً باشلاندیغینی و یاخشی سرعتله داوام ائتدیگینی ده آرتیردی.
سون اولاراق، هوشیار وورغولادی: "بو پروژه ده اساس هدف خالقین راضیلیغیدیر. اسلامی شهر شوراسینین بو طرحی تصویب ائتمه سی و بلدیه نین اجرایی چاره قیلمالاری، بو بویوک پروژه نین موفّقیّتینین اساس سببلریندن دیر."
قئید ائدک کی، "تبریزین قورتولوشو" ملّی طرحی آدلانان ۴۵ متیرلیک "شهید آیت الله آل هاشم" یول آچیلماسی پروژه سی تقریباً ۲ کیلومتر اوزونلوغوندا اولوب، ۱۰۰۰ میلیارد تومنلیک اعتبارایله اۆچ فازدا همزمان اجرا اولونور. عرضی ۴۵ متیر اولان بو یولدا یئرلشن ۷۷۲ دکان و مسکونی ملک تملیک ائدیلیب.
نظرات